நீட் தேர்வு ஹால் டிக்கெட் வெளியீடு
நீட் தேர்வு ஹால் டிக்கெட் வெளியீடு
புதுடில்லி: செப்டம்பர் 13ம் தேதி நடைபெறவுள்ள நீட் தேர்வுக்கான ஹால் டிக்கெட்டுகள் இணையத்தில் வெளியிடப்பட்டுள்ளது.
இளநிலை மருத்துவப் படிப்புகளுக்கான நீட் (NEET) நுழைவுத்தேர்வு செப்டம்பர் 13ம் தேதி, நாடு முழுவதும் மொத்தம் 3,843 மையங்களில் நடைபெறவுள்ளது. அதேபோல், ஜேஇஇ மெயின் தேர்வுகள் செப்.,1 முதல் 6ம் தேதி வரையிலும், ஜேஇஇ அட்வான்ஸ் தேர்வு செப்.,27ம் தேதியும் நடைபெறும் என மத்திய மனிதவள மேம்பாட்டு அமைச்சகம் அறிவித்துள்ளது. ஆனால், கொரோனா பரவலுக்கு இடையே நீட் மற்றும் ஜேஇஇ தேர்வுகளை ஒத்திவைக்க வேண்டும் என மாணவர்களும், அரசியல் கட்சியினரும் கோரிக்கை வைத்தனர்.
இது தொடர்பான மனுவையும் உச்ச நீதிமன்றம் சமீபத்தில் தள்ளுபடி செய்தது. இதற்கிடையே ஜேஇஇ தேர்வுக்கான ஹால் டிக்கெட் கடந்த வாரம் வெளியிடப்பட்டது. இந்நிலையில், நீட் தேர்வுக்கான ஹால் டிக்கெட் இன்று (ஆக.,26) இணையத்தில் வெளியிடப்பட்டுள்ளது. இணையதளத்தில் மாணவர்கள் தங்களது ஹால் டிக்கெட்டை பதிவிறக்கம் செய்துகொள்ளலாம் என அறிவிக்கப்பட்டுள்ளது.